ܡܘܿܕܝܼ ܝܠܵܗ̇ ܝܲܨܝܼܦܘܼܬܵܐ ܡܲܢܝܸܚܵܢܬܵܐ؟
ܝܲܨܝܼܦܘܼܬܵܐ ܡܲܢܝܸܚܵܢܬܵܐ ܝܼܠܵܗ̇ ܡܲܣܲܡܬܵܐ ܕܒܵܠܵܐ ܠܚܘܼܠܡܵܢܵܐ ܩܵܐ ܐ݇ܢܵܫܹ̈ܐ ܕܒܸܚܵܝܵܐ ܝܢܵܐ ܥܲܡ ܚܲܕ ܡܲܪܥܵܐ ܐܲܡܝܼܢܵܝܵܐ. ܝܲܨܝܼܦܘܼܬܵܐ ܡܲܢܝܸܚܵܢܬܵܐ ܟܹܐ ܡܩܲܢܛܪܸܢܵܐ ܥܲܠ ܪܲܗܲܬܘܼܬܵܐ، ܣܢܵܕܬܵܐ ܘܛܵܒ݂ܘܼܬܵܐ ܕܚܲܝܹ̈ܐ ܩܵܐ ܡܲܪ̈ܥܵܢܹܐ ܘܒܲܝܬܘܼܝܵܬܲܝܗ̈ܝ. ܟܹܐ ܗܲܝܸܪܵܐ ܩܵܐ ܐ݇ܢܵܫܹ̈ܐ ܕܚܵܝܝܼ ܚܲܝܹ̈ܐ ܛܵܒ݂ܹ̈ܐ ܐܲܝܟ݂ ܟܡܵܐ ܕܡܵܨܝܼ ܘܩܵܐ ܐܲܝܟ݂ ܟܡܵܐ ܕܡܵܨܝܼ.
ܐܝܼܡܲܢ ܡܵܨܝܵܐ ܝܲܨܝܼܦܘܼܬܵܐ ܡܲܢܝܸܚܵܢܬܵܐ ܕܫܲܪܝܵܐ؟
ܝܲܨܝܼܦܘܼܬܵܐ ܡܲܢܝܸܚܵܢܬܵܐ ܡܵܨܝܵܐ ܕܫܲܪܝܵܐ ܒܟܠ ܥܸܕܵܢܵܐ ܕܗܵܘܝܵܐ ܟܲܕ ܡܲܪܥܵܐ ܒܸܙܝܵܕܵܐ ܝܠܹܗ، ܠܵܐ ܐܲܚܟ̰ܝܼ ܒܡܸܬܚܵܐ ܕܫܵܒ݂ܘܿܥܹ̈ܐ ܝܲܢ ܝܵܘܡܵܢܹ̈ܐ ܐ݇ܚܵܪܵܝܹ̈ܐ. ܒܪܵܒܵܐ ܐܲܝܟܲܢܵܝܘܵܬܹ̈ܐ، ܚܲܕ ܦܲܪܨܘܿܦܵܐ ܡܵܨܹܐ ܕܩܲܒܸܠ ܝܲܨܝܼܦܘܼܬܵܐ ܡܲܢܝܸܚܵܢܬܵܐ ܟܲܕ ܐܵܢܝܼ ܗܵܠܵܐ ܩܲܒܘܼܠܹܐ ܝܢܵܐ ܕܲܪ̈ܡܲܢܝܵܬܹܐ ܐ݇ܚܪܹܢܹ̈ܐ ܩܵܐ ܡܲܪܥܲܝܗܝ.
ܡܵܢܝܼ ܟܹܐ ܡܩܪܸܒ݂ ܠܝܲܨܝܼܦܘܼܬܵܐ ܡܲܢܝܸܚܵܢܬܵܐ؟
ܝܲܨܝܼܦܘܼܬܵܐ ܡܲܢܝܸܚܵܢܬܵܐ ܡܵܨܝܵܐ ܕܦܵܝܫܵܐ ܡܘܼܩܪܸܒ݂ܬܵܐ ܒܝܲܕ ܐܲܝܢܝܼ ܚܲܒܝܼܪܵܐ ܕܚܘܼܠܡܵܢܵܐ ܕܗܵܘܹܐ ܐܲܝܟ݂ ܚܲܕ ܐܵܣܝܵܐ ܓܵܘܵܢܵܝܵܐ، ܚܲܕ ܚܲܒܝܼܪܵܐ ܐܵܣܝܘܼܬܵܢܵܝܵܐ ܝܲܢ ܚܕܵܐ ܢܹܪܣ.
ܚܸܠܡܲܬܹ̈ܐ ܕܚܲܒܝܼܪܹ̈ܐ ܕܝܲܨܝܼܦܘܼܬܵܐ ܡܲܢܝܸܚܵܢܬܵܐ ܡܵܨܝܼ ܕܦܵܝܫܝܼ ܡܘܼܩܪܸܒ݂ܹܐ ܐܝܼܡܲܢ ܕܢܝܼܫܲܢܩܹ̈ܐ ܕܡܲܪܥܵܐ ܕܦܲܪܨܘܿܦܵܐ ܒܸܗܘܵܝܵܐ ܝܢܵܐ ܒܘܼܫ ܡܥܲܩܕܹ̈ܐ. ܐܲܢܹܐ ܚܸܠܡܲܬܹ̈ܐ ܥܝܵܕܵܐܝܼܬ ܟܹܐ ܦܵܝܫܝܼ ܡܘܼܩܪܸܒ݂ܹܐ ܬܚܘܿܬ ܡܗܲܕܝܵܢܘܼܬܵܐ ܕܚܲܕ ܐܵܣܝܵܐ ܝܲܢ ܚܕܵܐ ܢܸܪܣ ܕܝܼܢܵܐ ܚܲܒܝܼܪܹܐ ܒܕܲܪܡܲܢܬܵܐ ܕܢܝܼܫܲܢܩܹ̈ܐ ܕܚܘܼܬܵܡܵܐ ܕܚܲܝܹ̈ܐ ܐܲܝܟ݂ ܨܲܢܓ̰ܘܼ ܚܲܝܠܵܢܬܵܐ، ܡܲܕܥܲܪܬܵܐ ܘܥܲܣܩܘܼܬܵܐ ܒܫܩܵܠܬܵܐ ܢܵܦܵܣ.
ܚܲܕ ܝܲܗܠܵܐ ܕܚܲܒܝܼܪܹ̈ܐ ܒܡܲܩܪܲܒ݂ܬܵܐ ܕܝܲܨܝܼܦܘܼܬܵܐ ܡܲܢܝܸܚܵܢܬܵܐ ܒܸܕ ܐܵܙܸܠ ܠܵܩܵܕ݇ܡܵܐ ܒܦܘܼܠܚܵܢܵܐ ܒܫܲܪܝܼܟܘܼܬܵܐ ܥܲܡ ܝܲܗܠܵܐ ܗܵܫܵܝܵܐ ܡܲܩܪܸܒ݂ܵܢܵܐ ܕܡܲܣܲܡܬܵܐ ܕܒܵܠܵܐ ܘܒܲܠܟܵܐ ܕܚܵܒ݂ܸܫ:
- ܐܵܣܝܹ̈ܐ
- ܢܸܪ̈ܣܝܼܹܐ
- ܚܲܒܝܼܪܹ̈ܐ ܐ݇ܚܝܵܢܵܝܹ̈ܐ ܕܚܘܼܠܡܵܢܵܐ
- ܨܲܝܕܵܠܵܢܵܝܹ̈ܐ
- ܐܵܣܝܹ̈ܐ ܕܢܲܦ̮ܫܵܐ
- ܦܲܠܵܚܹ̈ܐ ܪ̈ܘܼܚܵܢܵܝܹܐ ܝܲܢ ܪܲܥܝܘܼܬܵܢܵܝܹ̈ܐ ܕܡܲܣܲܡܬܵܐ ܕܒܵܠܵܐ
- ܦܵܠܵܚܹ̈ܐ ܨܸܒ݂ܝܵܢܵܝܹ̈ܐ ܕܝܲܨܝܼܦܘܼܬܵܐ ܡܲܢܝܸܚܵܢܬܵܐ
ܕܵܐܟ݂ܝܼ ܠܸܩܢܵܝܵܐ ܚܸܠܡܲܬܹ̈ܐ ܚܲܒܝܼܪܵܝܹ̈ܐ ܕܝܲܨܝܼܦܘܼܬܵܐ ܡܲܢܝܸܚܵܢܬܵܐ؟
ܚܕܵܐ ܡܲܦܫܲܛܬܵܐ ܠܚܸܠܡܲܬܹ̈ܐ ܚܲܒܝܼܪܵܝܹ̈ܐ ܕܝܲܨܝܼܦܘܼܬܵܐ ܡܲܢܝܸܚܵܢܬܵܐ ܡܵܨܝܵܐ ܕܦܵܝܫܵܐ ܥܒ݂ܝܼܕܬܵܐ ܒܝܲܕ ܚܲܕ ܦܲܪܨܘܿܦܵܐ ܠܚܘܼܕܵܝܵܐ ܝܲܢ ܒܝܲܕ ܚܲܕ ܗܲܕܵܡܵܐ ܕܒܲܝܬܘܼܬܵܐ ܝܲܢ ܡܲܣܸܡܵܢܵܐ ܕܒܵܠܵܐ، ܝܲܢ ܒܝܲܕ ܐܲܝܢܝܼ ܚܲܒܝܼܪܵܐ ܕܚܘܼܠܡܵܢܵܐ ܕܗܵܘܹܐ.
ܡܘܼܕܝ݇ ܦܸܨܠܵܐ ܕܝܲܨܝܼܦܘܼܬܵܐ (ܡܲܣܲܡܬܵܐ ܕܒܵܠܵܐ) ܟܹܐ ܡܲܩܪܸܒ݂ܝܼܠܵܗ̇ ܚܸܠܡܲܬܹ̈ܐ ܚܲܒܝܼܪܵܝܹ̈ܐ ܕܝܲܨܝܼܦܘܼܬܵܲܐ ܡܲܢܝܸܚܵܢܬܵܐ؟
ܚܸܠܡܲܬܹ̈ܐ ܚܲܒܝܼܪܵܝܹ̈ܐ ܕܝܲܨܝܼܦܘܼܬܵܲܐ ܡܲܢܝܸܚܵܢܬܵܐ ܟܹܐ ܚܵܒ݂ܫܝܼ:
- ܗܲܝܲܪܬܵܐ ܒܡܕܲܒܲܪܬܵܐ ܕܢܝܼܫܲܢܩܹ̈ܐ ܦܲܓ݂ܪܵܢܵܝܹ̈ܐ ܡܥܲܩܕܹ̈ܐ
- ܣܢܵܕܬܵܐ ܒܡܲܫܠܵܝܬܵܐ ܕܢܹܓܵܪܵܢܘܼܝܵܬܹ̈ܐ ܫܲܘܬܵܦܵܝܹ̈ܐ ܘܡܲܪ̈ܕܘܼܬܵܢܵܝܹܐ ܘܪ̈ܘܼܚܵܢܵܝܹܐ
- ܡܵܠܘܿܟ݂ܘܼܬܵܐ ܘܣܢܵܕܬܵܐ ܒܥܸܕܵܢܵܐ ܕܚܲܫܵܐ ܩܵܐ ܦܲܪܨܘܿܦܵܐ ܘܒܲܝܬܘܼܬܲܝܗܝ ܝܲܢ ܡܲܣܸܡܵܢܲܝܗ̈ܝ ܕܒܵܠܵܐ
ܐܲܝܟܵܐ ܡܵܨܝܼ ܚܸܠܡܲܬܹ̈ܐ ܚܲܒܝܼܪܵܝܹ̈ܐ ܕܝܲܨܝܼܦܘܼܬܵܐ ܡܲܢܝܸܚܵܢܬܵܐ ܕܦܵܝܫܝܼ ܡܘܼܩܪܸܒܹܐ؟
ܚܸܠܡܲܬܹ̈ܐ ܚܲܒܝܼܪܵܝܹ̈ܐ ܕܝܲܨܝܼܦܘܼܬܵܐ ܡܲܢܝܸܚܵܢܬܵܐ ܡܵܨܝܼ ܕܦܵܝܫܝܼ ܡܘܼܩܪܸܒܹܐ:
- ܓܵܘ ܒܲܝܬܵܐ
- ܓܵܘ ܒܹܝܬ ܟܪ̈ܝܼܗܹܐ
- ܓܵܘ ܚܲܕ ܒܹܝܬ ܝܲܨܝܼܦܘܼܬܵܐ ܩܵܐ ܡܲܪ̈ܥܵܢܹܐ ܕܡܝܵܬܵܐ ܝܢܵܐ
- ܓܵܘ ܒܲܝܬܵܐ ܕܩܵܐ ܡܲܣܲܡܬܵܐ ܕܒܵܠܵܐ ܠܥܒ݂ܝܼܪܹ̈ܐ ܒܫܸܢܹ̈ܐ
- ܓܵܘ ܒܲܝܬܵܐ ܕܡܥܲܘܟ݂ܘܼܬܵܐ ܣܢܝܼܕܬܵܐ
ܟܡܵܐ ܟܹܐ ܕܵܩܪܝܼ ܚܸܠܡܲܬܹ̈ܐ ܚܲܒܝܼܪܵܝܹ̈ܐ ܕܝܲܨܝܼܦܘܼܬܵܐ ܡܲܢܝܸܚܵܢܬܵܐ؟
ܣܲܗܡܵܐ ܙܵܘܕܵܐ ܕܚܸܠܡܲܬܹ̈ܐ ܚܲܒܝܼܪܵܝܹ̈ܐ ܕܝܲܨܝܼܦܘܼܬܵܐ ܡܲܢܝܸܚܵܢܬܵܐ ܝܼܢܵܐ ܡܲܓܵܢܵܝܹ̈ܐ. ܬܵܡܵܐ ܒܲܠܟܵܐ ܕܗܵܘܝܼ ܚܲܕܟܡܵܐ ܦܘܼܪ̈ܥܵܢܹܐ ܩܵܐ ܕܲܪ̈ܡܵܢܹܐ ܝܲܢ ܐܲܣܵܢܹ̈ܐ ܕܒܸܕ ܦܵܝܫܝܼ ܕܪ̈ܝܼܫܹܐ ܐܸܢ ܣܢܝܼܩܘܼܬܵܐ ܛܵܠܒܵܐ.
ܐܲܝܢܝܼ ܣܵܢܕܬܵܐ ܐܝܼܬ ܩܵܐ ܒܲܝܬܘܼܝܵܬܹ̈ܐ ܘܡܲܣܸܡܵܢܹ̈ܐ ܕܒܵܠܵܐ؟
ܚܸܠܡܲܬܹ̈ܐ ܚܲܒܝܼܪܵܝܹ̈ܐ ܕܝܲܨܝܼܦܘܼܬܵܐ ܡܲܢܝܸܚܵܢܬܵܐ ܐܲܦ ܟܹܐ ܡܲܩܪܸܒ݂ܝܼ ܣܢܵܕܬܵܐ ܦܪܲܩܛܝܼܩܵܝܬܵܐ ܘܪܸܓ݂ܫܵܢܵܝܬܵܐ ܩܵܐ ܒܲܝܬܘܼܝܵܬܹ̈ܐ ܘܡܲܣܸܡܵܢܹ̈ܐ ܕܒܵܠܵܐ.
ܡܘܿܕܝܼ ܐܸܢ ܐܝܼܬ ܣܢܝܼܩܘܼܬܵܐ ܩܵܐ ܚܲܕ ܡܬܲܪܓܡܵܢܵܐ؟
ܐܵܢܲܢܩܵܝܬܵܐ ܝܠܵܗ ܕܡܲܕܥܹܝܬܘܿܢ ܩܵܐ ܚܸܠܡܲܬ ܐܸܢ ܐܝܼܬ ܣܢܝܼܩܘܼܬܵܐ ܩܵܐ ܚܲܕ ܡܬܲܪܓܡܵܢܵܐ ܒܥܸܕܵܢܵܐ ܕܣܲܚܒܲܪܬܵܐ.
ܕܵܐܟ݂ܝܼ ܡܲܫܟ݂ܚܸܢ ܠܵܗ̇ ܚܕܵܐ ܚܸܠܡܲܬ ܝܲܢ ܩܵܢܹܝܢ ܒܘܼܫ ܙܵܘܕܵܐ ܡܵܘܕܥܵܢܘܼܬܵܐ؟
- ܗܲܡܙܸܡܘܼܢ ܥܲܡ ܐܵܣܝܵܘܟ݂ܘܿܢ ܝܲܢ ܚܲܒܝܼܪܵܘܟ݂ܘܿܢ ܝܲܢ ܥܲܡ ܐܲܝܢܝܼ ܚܲܒܝܼܪܵܐ ܕܚܘܼܠܡܵܢܵܐ ܕܗܵܘܹܐ
- ܡܲܚܒܸܪܘܼܢ ܩܵܐ ܚܸܠܡܲܬ ܕܝܲܨܝܼܦܘܼܬܵܐ ܡܲܢܝܸܚܵܢܬܵܐ ܓܵܘ ܦܢܝܼܬܵܘܟ݂ܘܿܢ
- ܡܲܚܒܸܪܘܼܢ ܩܵܐ Palliative Care Victoria
- ܡܲܚܒܸܪܘܼܢ ܥܲܠ ܬܹܠܝܼܦ̮ܘܿܢ ܡܸܢܝܵܢܵܐ 9644 9962 03 (ܒܹܝܠ ܣܵܥܲܬ 9 ܒܩܲܝܕܲܡܬܵܐ ܘ 5 ܒܪܲܡܫܵܐ، ܒܝܵܘܡܵܢܹ̈ܐ ܕܬܪܹܝܢܒܫܲܒܵܐ ܗܲܠ ܥܪܘܼܒ݂ܬܵܐ)
- ܐܝܼܡܵܝܠ: info@pallcarevic.asn.au
ܚܲܕ ܡܬܲܪܓܡܵܢܵܐ ܒܐܘܼܪܚܵܐ ܕܬܹܠܝܼܦ̮ܘܿܢ ܡܵܨܹܐ ܕܦܵܐܸܫ ܡܘܼܪܝܸܙܵܐ. ܐܸܢ ܒܵܣܡܵܐ ܠܵܘܟ݂ܘܿܢ ܡܲܕܥܹܝܡܘܼܢ ܠܲܢ ܠܐܲܝܢܝܼ ܠܸܫܵܢܵܐ ܐܲܚܬܘܿܢ ܣܢܝܼܩܹܐ ܝܬܘܿܢ.
Further Resources
What is palliative care? - Assyrian