Што е палијативна нега?
Палијативната нега е здравствена нега за луѓе кои живеат со неизлечлива болест. Таа се фокусира на удобност, поддршка и квалитет на живот за пациентите и нивните семејства. Таа им помага на луѓето да живеат колку што е можно подобро, колку што е можно подолго.
Кога може да започне палијативната нега?
Палијативната нега може да започне во било кој момент од прогресивната болест, не само во последните недели или денови. Во многу случаи, лицето може да прима палијативна нега додека сè уште прима други третмани за својата болест.
Кој обезбедува палијативна нега?
Палијативната нега може да ја обезбедува било кој здравствен работник, како што се матичен лекар, специјалист или медицинска сестра.
Специјализираните услуги за палијативна нега може да се вклучат кога симптомите на лицето стануваат покомплексни. Тие обично се водени од лекар или медицинска сестра кои се специјализирани за контрола на симптомите на крајот од животот, како што се силна болка, повраќање и отежнато дишење.
Тимот за специјализирана палијативна нега ќе продолжи да работи во партнерство со постојниот здравствен тим на лицето и може да вклучува:
- Лекари
- Медицински сестри
- Здравствени работници од здруженото здравство
- Фармацевти
- Психолози
- Работници за духовна или пасторална нега
- Волонтери за палијативна нега
Како да се добијат услуги за специјализирана палијативна нега?
Упатување до услуги за специјализирана палијативна нега може да направи поединец, член на семејство или негувател, или кој било здравствен работник.
Каква нега обезбедуваат специјализираните служби за палијативна нега?
Услугите за специјализирана палијативна нега вклучуваат:
- Помош при контрола на комплексни физички симптоми
- Поддршка за социјални, културни и духовни прашања
- Советување и поддршка при тага за лицето и неговото семејство или негуватели
Каде може да се обезбедуваат услугите за специјализирана палијативна нега?
Палијативната нега може да се обезбедува:
- Дома
- Во болница
- Во програма/болница за палијативна медицина (hospice)
- Во дом за стари лица
- Во поддржано сместување за лица со попреченост
Колку чинат услугите за специјализирана палијативна нега?
Повеќето услуги за палијативна нега се бесплатни. Може да има одредени трошоци за лекови или опрема, кои ќе бидат разгледани доколку е потребно.
Каква поддршка е достапна за семејствата и негувателите?
Услугите за специјализирана палијативна нега исто така обезбедуваат практична и емоционална поддршка за семејствата и негувателите.
Што доколку е потребен преведувач?
Важно е да се извести службата доколку е потребен преведувач за време на посетата.
Како да најдам услуга или да добијам повеќе информации?
- Разговарајте со вашиот лекар, специјалист или било кој здравствен работник
- Јавете се во вашата локална служба за палијативна нега
- Контактирајте со Palliative Care Victoria
Може да се обезбеди телефонски преведувач. Ве молиме кажете ни кој јазик ви е потребен.